مرحبا مساء الخير او صباح الخير لكل مستمع ومستمعة لحلقة ٢٠ من حديث طالب معاكوا مروان بلان.

حلقتنا اليوم قصيرة ورح نحكي عن موضوع بهمني كتير وبشوف كتير ناس بتعاني منه وخاصةً مع ارتفاع الاسعار وغلاء المعيشة.

لما كنت باللقب الاول كنت اشوف طلاب وطالبات كل يوم والتاني طالعة تسهر او تحضر فيلم او رايحة توكل بمطعم فاخر او تعمل شوبينغ باستمرار.

وكـطلاب محدودين الدخل كلنا كنا نعرف انه هدول الشباب والصبايا عم بصرفوا على حساب اهلهن بمعظمهن.
كنا نقول هدول معهن مصاري خليهن يصرفوا…

فكرت انه هاي الشغلة هي مجرد ظاهرة صغيرة ورح تختفي لما يبلشوا هدول الاشخاص يشتغلوا ويعملوا مصاري بتعبهن، عاساس ساعتها رح يقدروا قيمة المصاري اكتر.

لكن لما بلشت شغل، صرت اشوف هاي الاشخاص او اشخاص بشبهوهن بعدهن بتصرفوا بنفس الطريقة او حتى بشكل اسوا.

بهاي الايام الشغل بالهايتك بتترجم طوالي لمعاش عالي ونمط حياة مريح.

وهون المشكلة الاساسية. نمط الحياة المريح.

نمط الحياة هو مجرد خليط من التصرفات الي بتميز فئة معينة من الناس.

نمط حياة دكتور يختلف عن نمط حياة محامي او محاسبة او مهندسة.

نمط الحياة بشمل الفعاليات الي بتروح عليها، المطاعم الي بتوكل فيها، الاواعي الي بتلبسها، السيارة الي بتسوقها، البيت الي بتسكنه ونوعية المشاوير الي بتبسطك.

كل هدول بتلخصوا بسطر واحد بالمعاش: قديش صرفت مصاري هاد الشهر.

الفخ الي بوقع فيه اغلب الناس هو انهن بفكروا الحياة المنيحة هي علاقة طردية بين المعاش والمصاريف:
فكلما ارتفع المعاش برتفع مقابلها المصاريف.

كلما ترقيت بالشغل بصير وقت اجدد سيارة او بيت او اواعي او اكل او مشاوير.

فا بتلاقي انه كتير اشخاص وضعها المادي منيح ومعاشها نص نص، لكن كتير اشخاص وضعهن المادي سيء جدا ومعاشهن جدا عالي.

الفخ هاد جدا خطير وواحدة من الاسلحة الي بتحميني من اني ما اوقع بهاد الفخ هي اني احدد بيني وبين حالي نمط الحياة المناسب الي بدون علاقة  لشو المجتمع بحدد.

بكلمات تانية احافظ على عيشة منيحة بمستوى معيشة منيح.
اليوم كمهندس ما بفرق كتير مصروفي عن لما كنت طالب او قبل ما ابدا تعليم.

ومش كتير بتفرق عندي شو الناس بتفكر.

كمان شغلة منتجاهلها هي التوفير. صار ازا حدا بوفر مصاري معناته بخيل وبصرفش كفاية عحاله.

لا يا جماعة مش هيك، الحياة فيها كتير مشاريع الي بتتطلب تكون موفرها من قبل حتى لونك اسا مش واعيلها.

ومهما كان معاشك اكيد بتقدر توفر منه.
ازا بتقبض ١٠٠$ بالشهر وفر منها

ازا بتقبض ٥٠٠$ وفر منها

ازا بتقبض ١٠٠٠$ وفر منهن

ازا بتقبض ١٠٠٠٠٠$ وفر منهن

وازا عجبتك هاي الحلقة ابعتها لحدا بهمه الموضوع عشان تحكيله انك مهم بالنسبة اله

تاكد او تاكدي انك متابعتينا على المنصات الي بتحبيها

واستنونا بحلقة جديدة…

سلامات